1. Trosolwg
Bydd hyn yn esbonio eich cyfrifoldebau fel cyflogwr o dan gyfraith iechyd a diogelwch Prydain i ddiogelu gweithwyr mudol.
Mae pob gweithiwr yn cael eu diogelu o dan gyfraith iechyd a diogelwch, p'un a oes ganddyn nhw hawl cyfreithiol i weithio ym Mhrydain Fawr ai peidio. Mae'r gyfraith yn berthnasol yr un fath i weithwyr mudol ag y mae i weithwyr Prydeinig.
Mae'n rhoi cyfrifoldebau iechyd a diogelwch ar gyflogwyr a gweithwyr fel ei gilydd.
Gall gweithwyr o'r tu allan i Brydain ddod ar draws risgiau anghyfarwydd, weithiau oherwydd amgylchedd gwaith neu ddiwylliant gwaith gwahanol i'r hyn a brofwyd yn eu mamwlad.
Mae gweithwyr mudol yn gweithio'n gyffredin mewn diwydiannau megis:
- amaethyddiaeth a phrosesu bwyd
- arlwyo a lletygarwch
- glanhau
- adeiladu
- gofal iechyd
- gweithgynhyrchu
- gwastraff ac ailgylchu
Mae gan y diwydiannau hyn a diwydiannau eraill risgiau iechyd a diogelwch adnabyddus a gallant ddarparu mwy o risg i weithwyr mudol pan:
- maent wedi cael cyfnod cymharol fyr o gyflogaeth ym Mhrydain Fawr
- maent yn newydd i'r swydd neu'n anghyfarwydd â'r diwydiant felly ddim yn deall yr holl risgiau
- mae ganddynt wybodaeth gyfyngedig o system iechyd a diogelwch Prydain, neu mae gan ein system ymagwedd wahanol at y system yn eu mamwlad
- nid oes ganddynt lawer o wybodaeth am eu hawliau iechyd a diogelwch, sut i godi problem gyda'u cyflogwr neu sut i gael help
- mae rhwystrau iaith yn cyfyngu ar eu gallu i gyfathrebu'n effeithiol â gweithwyr a goruchwylwyr eraill, gan ei gwneud hi'n anodd deall hyfforddiant a chyfarwyddyd
- mae cyflogwyr yn methu â gwirio eu sgiliau ar gyfer y gwaith (gan gynnwys sgiliau iaith) neu'n methu â darparu hyfforddiant a chyfarwyddyd iechyd a diogelwch priodol