Darparu ar gyfer anghenion iechyd, diogelwch a lles sylfaenol
Rhaid i chi ddarparu amgylchedd diogel ac iach ar gyfer pob un o'ch cyflogeion. Mae angen i chi ystyried eu hanghenion lles hefyd. Mae hyn yn cynnwys pobl ag anableddau.
Er enghraifft, rhaid i chi ddarparu toiledau, cyfleusterau golchi a dŵr yfed, ac mae angen i chi ystyried pethau fel goleuadau a thymheredd.
A yw hyn yn effeithio ar fy musnes?
Mae gofynion cyfreithiol sy'n berthnasol i'r rhan fwyaf o weithleoedd: Rheoliadau'r Gweithle (Iechyd, Diogelwch a Lles) 1992. Mae rhai gweithleoedd, fel safleoedd adeiladu, wedi'u cwmpasu gan ddeddfwriaeth HSE ar wahân.
Os nad ydych yn sicr, cysylltwch â Llinell wybodaeth HSE ar 0845 345 0055.
Beth mae angen i gyflogwyr ei wneud
Mae’r adran hon yn rhoi amlinelliad byr o'r gofynion. Am ragor o wybodaeth am unrhyw un o'r pynciau a restrir, cyfeiriwch at daflen am ddim HSE INDG 244 Iechyd, diogelwch a lles yn y gweithle - Canllaw byr i reolwyr [175KB] 
..
Cyfleusterau lles
Toiledau, basnau golchi dwylo, cyfleusterau cawod ac ymolchi
Rhaid i chi ddarparu:
- toiledau glân, wedi'u hawyru'n dda (rhai ar wahân i ddynion a merched onid oes gan bob cyfleuster ei ddrws ei hun y gellir ei gloi);
- basnau ymolchi gyda dŵr oer a phoeth (neu gynnes) sy'n rhedeg;
- cawodydd ar gyfer gwaith brwnt a allai halogi'r croen;
- sebon a thywelion (neu sychwr dwylo).
Dŵr yfed
Rhaid i chi ddarparu cyflenwad digonol o ddŵr yfed o safon uchel, gyda phistyll yfed esgynnol neu gwpanau addas. Nid oes rhaid nodi dŵr yfed oni bai bod risg sylweddol fod pobl yn yfed dŵr na ddylid ei yfed.
Lleoliad ar gyfer dillad a chyfleusterau ar gyfer newid
Rhaid i chi ddarparu cypyrddau bach neu le i hongian dillad a chyfleusterau ar gyfer newid lle y gwisgir dillad arbennig. Dylai'r cyfleusterau ddarparu ar gyfer sychu dillad.
Cyfleusterau ar gyfer gorffwys ac i fwyta prydau
Rhaid i chi ddarparu cyfleusterau ar gyfer gorffwys, gan gynnwys cyfleusterau i fwyta bwyd. Dylid darparu cyfleusterau gorffwys addas ar gyfer merched beichiog a mamau sy’n magu.
[yn ôl i'r brig]
Materion iechyd
Awyru
Rhaid sicrhau bod y gweithle wedi'i awyru'n dda:
- Cyflenwad o aer ffres a glân o'r tu allan neu o systemau awyru. Ni ddylai fod wedi'i lygru a dylai gylchredeg drwy'r gweithle.
- Dylai system awyru hefyd gael gwared ar awyr cynnes a'i wanhau a chaniatáu i awyr symud heb achosi drafft.
Tymheredd
Mewn gweithleoedd dan do, rhaid i chi ddarparu:
- tymheredd gweithio rhesymol; 16°C o leiaf fel arfer, neu 13°C ar gyfer gwaith llafurus (oni fydd deddfau eraill yn gofyn am dymereddau is);
- systemau gwresogi neu oeri lleol lle na ellir cynnal tymheredd cyfforddus ym mhob ystafell waith, er enghraifft, prosesau poeth ac oer;
- dillad thermol a chyfleusterau ar gyfer gorffwys lle bo angen, er enghraifft ar gyfer ‘gwaith poeth’ neu storfeydd oer;
- systemau gwresogi nad ydynt yn gollwng lefelau peryglus nac annymunol o fygdarth i'r gweithle;
- lle digonol mewn ystafelloedd gwaith.
Goleuadau
Rhaid i chi ddarparu:
- golau da; defnyddiwch olau naturiol lle y bo'n bosibl, ond ceisiwch osgoi llewyrch;
- lefel dda o oleuadau lleol ar weithfannau lle bo angen;
- ffurfiau goleuo addas. Gall rhai tiwbiau fflwroleuol 'grynu' a gallant fod yn beryglus gyda rhai peirannau sy'n troi (gan y gall ymddangos bod rhan sy'n troi wedi stopio).
Glanweithdra a deunyddiau gwastraff
Rhaid i chi:
- ddarparu adeiladau, dodrefn a gosodiadau glân (e.e. goleuadau);
- darparu lloriau a grisiau glân, nad ydynt yn llithrig;
- darparu cynwysyddion ar gyfer deunyddiau gwastraff;
- gwaredu baw, sbwriel a gwastraff masnachol yn rheolaidd;
- glanhau gollyngiadau'n brydlon;
- cadw waliau a nenfydau mewnol yn lân.
Mesuriadau ystafelloedd a lle gwag mewn ystafelloedd
Dylai fod gan ystafelloedd gwaith ddigon o le gwag i ganiatáu i bobl symud o gwmpas yn hawdd. I gael arweiniad ar fesuriadau ystafelloedd cyfeiriwch at daflen INDG244:
Gweithfannau a seddau
Rhaid i weithfannau fod yn addas i'r gweithiwr a'r gwaith a dylai pobl allu gadael gweithfannau yn gyflym mewn argyfwng. Gwnewch yn siŵr:
- bod cynalyddion cefn seddau'n cynnal y meingefn a rhaid i chi ddarparu troedfeinciau os oes angen;
- bod arwynebau gwaith ar uchder call;
- bod mynediad hawdd i reolyddion ar offer.
[yn ôl i'r brig]
Materion diogelwch
Cynnal a chadw'r gweithle ac offer gwaith
Rhaid i chi:
- gadw adeiladau ac offer gwaith mewn cyflwr da;
- sichrau bod lle i allu symud a chael mynediad yn ddiogel, er enghraifft, i beiriant;
- darparu gwydr ffenestri diogel, os oes angen, er enghraifft gwydr wedi'i baentio, gwydr gwydn neu wydr trwchus, sydd wedi'i nodi i'w gwneud yn hawdd i'w weld;
- sicrhau draeniad da ar gyfer prosesau gwlyb;
- darparu cysgod rhag y tywydd ar gyfer gweithleoedd awyr agored, os yw'n ymarferol;
- cadw llwybrau awyr agored yn ddiogel adeg rhew, er enghraifft, taenu halen/tywod a'u hysgubo.
Lloriau a llwybrau traffig
Rhaid i chi:
- lloriau, coridorau a grisiau ac ati sy'n glir o rwystrau, er enghraifft, ceblau;
- arwynebau nad ydynt yn llithrig;
- ardaloedd awyr agored wedi'u goleuo'n dda - bydd hyn yn helpu gyda diogelwch hefyd;
- llwybrau diogel ar gyfer cerddwyr a cherbydau - y ffordd orau yw cadw cerbydau a cherddwyr ar wahân trwy ddefnyddio llwybrau ar wahân;
- arwynebau gwastad, llyfn heb dyllau nac estyll wedi torri;
- rheiliau llaw ar risiau a rampiau lle bo angen;
- drysau diogel, er enghraifft, paneli gweld mewn drysau siglo, a dyfeisiau diogelwch ar ddrysau â phŵer.
Drysau, gatiau, waliau a ffenestri tryloyw a lled dryloyw
Dylai ffenestri, arwynebau tryloyw neu led dryloyw mewn waliau, partisiynau, drysau a gatiau, pan fo'u hangen i ddiogelu iechyd a diogelwch, fod wedi’u gwneud o ddeunydd diogelwch neu dylent fod wedi’u diogelu rhag torri. Dylid eu nodi'n glir os oes perygl y gallai pobl wrthdaro â hwy.
Ffenestri a glanhau diogel
- Rhaid i chi sicrhau y gellir glanhau ffenestri yn ddiogel.
- Dylid cynllunio ffenestri y gellir fel eu bod yn agor yn ddiogel ac yn atal pobl rhag syrthio allan ohonynt neu daro i mewn iddynt.
Grisiau symudol a llwybrau symudol
Dylai grisiau symudol a llwybrau symudol weithio’n ddiogel a dylent fod wedi’u ffitio ag unrhyw ddyfeisiau diogelwch angenrheidiol ac un neu ragor o reolyddion stopio brys sy’n hawdd eu hadnabod a’u cyrraedd.
Taflenni perthnasol HSE am ddim :
Gallwch brynu'r cyhoeddiadau canlynol o HSE Books:
